Hadeer Taha

أنا و التيريلا و هواك

كل يوم ع الدائرى و المحور معاك

ماشى جنبى و كأنك صحبى

تبصلى من فوووووق و تكلكسلى

يا لهوى!

هو أنا ناقص خضة

مش كفاية الشارع ضلمة
مافهوش ولا لمبة

عارف زمان
الشارع كان فيه أمان
ماحدش كان بيخاف السواق يقع ينام
يسبب حـــادثــة… كـــارثــة
و يقفل الطريق من هنا لأمستردام

ما أنت طول عمرك شغال و بتحمل
ماتجيش ع الأخر و تنمل
اللى فى الشارع جنبك دول ناس
مش إقفاص طماطم و كور قلقاس

كل ما أبص جنبى، من شباكى الصغيور

بحس إنى نملة بتبص لدايناصور

منظر بقى طبيعى
ما حصلش فى أى عصر من العصور

PRINT THIS POST WORDS: Notes: 3 12/25/12 — 4:44pm Short URL: http://tmblr.co/Z76O1va9ZU9m

إشارة مرور

و العربية واقفة عادى جنب الحنطور

كل ما أقف فى ميدان

عينى ترف و عقلى يفور

ماحدش ماشى فى حارته

و كله بيكسر إشارته

الميدان بقى بظرميط

مولد أبو عجوة، و كله عامل عبيط

مافيش عربية فى الشارع مش متطبقة

ولا من غير خربوش

كله بيخش فى بعضة و يتخانق

و ما حدش بيحوش

الموتوسيكل يكسر عليك من غير إحم ولا دستور

و التك تك ماشى فى نص الشارع رايح معاك كارفور

ما هى الإشارة فى بلدنا مجرد ديكور

PRINT THIS POST WORDS: Notes: 3 12/25/12 — 4:25pm Short URL: http://tmblr.co/Z76O1va9UqTf